Una aaqqissuussaq pillugu

Piffissaq
16:00 - 18:30
Akia
Akeqanngilaq
Sullinniakkat

Augo Lyngep atuakkiaata 90-inngortorsiornera

Ukiut tamaasa Nunatta atuagaateqarfia atuakkiortumik malunnartitsisarpoq.

Kalaallit atuakkiortut kalaallit atuakkiaannut sunniuteqarluarsimasut malunnartinneqartarput.

Ukioq manna malunnartinneqartussaq tassaavoq Augo Lyngep atuakkiaa ´Ukiut 300-ngornerat´. Saqqummeqqaarneraniit ukioq manna ukiut 90-it qaangiupput.
Atuakkap imarisaa ukioq 2021-imi pisimasuutitaavoq, Hans Egedep Kalaallit Nunaannut tikinneraniit ukiut 300-t qaanngiunneranni. Kalaallit Nunaanni illoqarfiit ilaanni inuuneq atuakkami oqaluttuarineqarpoq. Politikkikkut isummat kulturikkullu kingornussaqarneq ilaatigut oqaluttuarineqarlutik.
Oqaluttuarisaaneq inuiaqatigiinnilu pissutsit aallavigalugit atuagaq eqqartussallugu aamma soqutiginarpoq. Atuakkiortoq Augo Lynge politikeriusimammat inuiaqatigiinnilu pissutsit pillugit eqqartuinerni akuusarsimammat.

Ukioq manna Ajannguaq Grønvold Oqaasilerinermi, Atuakkialerinermi Tusagassiuutilerinermilu cand.mag.-iusoq qaaqquarput. Grønvoldip Ilisimatusarfimmi inaarutaasumik allaaserisamini qulequtsiussimavaa oqariartuutit toqqoqqasut sammisallu paquminartut kalaallit atuakkiaanni (Kalaallit atuakkiaanni oqariartuutit toqqoqqasut paquminartullu 1914-2019). Grønvoldip atuakkialerinerup tungaatigut atuagaq atuakkamillu atuakkiortoq pillugit saqqummiussissaaq.

Ukioq manna malunnartitsinermi atuakkamik atuakkiortup ilaqutaanik peqataasoqassaaq. Atuakkamik atuakkiortup ernera Augo Lynge nulialu Birthe Lynge peqataasapput.

Ebbe Volquardsenip Kulturimik, Oqaatsinik Oqaluttuarisaanermilu immikkoortortaqarfimmi Nuummiittumi Ilisimatusarfimmi lektorip kulturip oqaluttuarisaanerullu tungaatigut atuakkap imarisaa atuakkamillu atuakkiortoq pillugit saqqummiussissaaq.

AneMarie Ottosen
Ilinniartitsisutut 2011-mi isiginnaartitsisartutullu 2016-mi allagartartaarpoq. Ukiullu kingulliit ilinniartitsisuullunilu isiginnaartitsisartuuvoq, meeqqanut inersimasunullu isiginnaagassialiortarluni ilitsersuisarlunilu. AneMarie atuakkamit atuffassisuussaaq.

Nunatta Atuagaateqarfiani saqqummersitsineq Augo Lyngep ilaqutai suleqatiginerisigut piviusunngortinneqarpoq.