Una aaqqissuussaq pillugu

Piffissaq
19:00 - 20:30
Akia
Akeqanngilaq
Sullinniakkat

Oqalugiarneq: Tabita

Atuagaq Tabita pillugu Iben Mondrup atuakkiortutut oqalugiassaaq ilisimatooq Gitte Adler Reimer oqaloqatigiutigalugu.

Oqalugiarnerup aallaavigissavaa Iben Mondrupip atuakkiarisimasaa ‘Tabita’. Piffissaq qallunaat-kalaallit oqaluttuarisaanerata nalaaniippoq taamani meeqqat naliginnaapajaartiinnarlugu qallunaanut meeravissianngortarsimapput.

Atuagaq pillugu
Nuliariit Eva Berthelilu ukiorpassuit kalaallit nunaanneereersimallutik Danmarkimut angerlarput marlunnik meeravissiartaarsimallutik. 60-ikkut qeqqata missaanni pisimasuutinneqarpoq, Evakkut Berthelilu aappariinnerlulerput pissutsillu Kalaallit Nunaata Danmarkillu akornanni pissusissamisoorpallaarunnaarput. Meeqqat marluk, Tabita Vitulu ilaqutariinnut nutaanut pulaniarsarilerput pisimasunik eqqartuiffioqqusinngitsumut, kultoorit marluk akornanni oqaatigineqanngisaannartorpassuarnik naalaruluutaasinnaasorpassuarnillu ulikkaartumut. Kingunipilutitsisoqarsimavoq sualummik meeqqanut.

Meeravissiartaarnerit
Gitte Adler Reimer Kalaallit Nunaanni ilaqutariit akornanni meeravissiartaartitsisarneq pillugu ph.d-liorsimasoq, Ibenip oqalugiaataa ilisimatuutut sammissavaa. Sammisami Kalaallit Nunaanni meeravissiartaartarnerit pillugit ingammik 1960-ikkunni 1970-ikkunnilu maannakkut nunatsinni apeqquserneqartalersimavoq oqaluuserineqartalerlunilu.

Nuuk Nordisk Kulturfestivalip ukioq manna qulequtarivaa Journey (angalaneq). Iben Mondrupip atuakkiaani Tabitami pingaarnertut inuttaritinneqartup misigissutsikkut timikkullu ‘angalanera’ oqaluttuaraa. Taamaammat atuagaq ukioq manna qulequtarisamut tulluarpoq atuakkallu oqaluuserinissaa pingaaruteqarluni.