Atuakkanik saqqummersitsineq

Nunarsuami anguniakkani arfineq aappaat ”Piujuartitsilluni nukissiorneq” sammineqarnerani, saqqummersitsinermi Nukissiorfiit pineqarpoq.

Nukissiorfiup nukissiornerani 70.5%-ia nukissiaavoq ’ataavartumik tunngaveqartumik nukissiaq’ isumaqarporlu nukissiuut killeqanngitsoq, tamanna iluaqutigalugu ikummatissat nunamit pisut pisariaqartinneqarnerat millivoq, assersuutigalugu uulia nunatta avataaniit eqqunneqartartoq.

Nukissiorfiup Kalaallit Nunaanni inuiaqatigiinnut innaallagissiornissaq, kiassarnermik imermillu ataavartumik nioqqutissiornissaq nassiussuinissarlu akisussaaffigaa.

Ataavartumik nukissiap annertunersaa erngup nukissiorneranik pilersinneqartarpoq annikinnerusumillu eqqakkanik ikuallaavinnit ikuallatanik nukissiorneq pilersinneqartarluni. Seqerngup qinngorneranik aamma anorip nukinganik nukissiornerup sulissutigineqarnera annertusiartorpoq.

Alaskami Canadamilu misilittakkat takutippaat ataavartumik nukissiorneq nunani issittuni atorluarneqarsinnaasoq – nalunngiliuk 2018-imili Sisimiut eqqaani nunaqarfinni anorip nukinganik innaallagissiuteqartoq? Igalikumilu atortut assigiinngitsut atorlugit seqerngup qinngorneranik tigooraasunik nukissiuuteqartut? Nukissiorfiit misilittakkanik katerseriarlutik anorip nukinganik seqerngullu qinngorneranik tigooraasunik innaallagissiutinik nuna tamakkerlugu peqalissanersoq nalilersuisarput.

Atuakkanik saqqummersitsinermi Nukissiorfiit oqaluttuarisaanerat ataavartumillu tunngaveqartumik nukissiorneq paasisaqarfiginissaa periarfissarivat.

Saqqummersitsineq marlunngorneq apriilip 19-ianniit tallimanngorneq apriilip 29-at 2022-p tungaanut sivisussuseqarpoq. Atuakkat saqqummersitat tamarmik atorneqarsinnaapput.

Piujuartitsilluni nukissiorneq soqutigigukku Nunatta Atuagaateqarfiani aamma anguniakkat arfineq aappaat sammisarigaat alakkarsinnaavat.