Kalaallit Nunaanni timersornerup oqaluttuassartaanit tigulaakkat
Kalaallit Nunaani timersorneq
Timersuutit allaaserineqarneri siulliit
1586-imili ilisimasassarsiortup John Davis-ip kalaallinik arsaqateqarsimallutik eqqaavaa:
"Divers times they did weave us on shore to play with them at the foot-ball, and some of our company went on shore to play with them, and our men did cast them downe as soone as they did come to strike the ball." 1
Timersoqatigiiffiit siulliit
Augo Lynge Atuagagdliutini 1933-imi saqqummersuni europami timersuutit assigiinngitsut pillugit allaaserisaqarpoq, nunatsinnilu inuusuttut kaammattorlugit timersoqartigiiffinnik aallartitseqqullugit.
Nunatsinni timersoqatigiiffiit siulliit 1930'ikkunni pilersinneqarput ukiullu qulit iluini peqatigiiffiit aqqanillit allattorsimasut takuneqarsinnaapput.
Unammisarnerit siulliit
Unammiuaarnerit peqatigiiffimmit aaqqissuussat siulliit pipput juulip 19-anni aamma 20-anni 1934. Aaqqissuisuuvoq timersoqatigiiffik Akigssiak, makkulu unammissutigineqarput: arsaanneq, arpaliuunneq, pissigarneq eqittarnerlu.2
Kalaallit Nunaanni Timersoqatigiit Kattuffiat
Kalaallit Nunaanni Timersoqatigiit Kattuffiat aallartinneqarpoq 1953-imi septembarip pingajuanni aallarnersaataasumik ataatsimiinnermi Sisimiuni ingerlanneqartumi.
G. I. F.-ip aaqqissuussaa annertooq siulleq pivoq marsimi 1954, pisortatigoortumik sisoraatinik pissartanngorniuunneq inunnik 90-it missaanik peqataaffigineqartoq ingerlanneqarmat. Peqataasut amerlanersaat sisimiuniit maniitsumiillu aggersuupput. Unammissutigineqarput tinngallattaarneq, sangusaarneq, ujakkaarneq sisupiloornerlu.
Kalaallit Nunaat OL-ilu
Atuagagdliutini 1937-meersuni nr.19-mi Berlinimi 1936-mi olympiadertoqarnera pillugu Frederik Nielsen allagaqarpoq.
Tassani atuartartut akiuminaatsumik apeqquteqarfigai:
Sooq Kalaallit Nunaanneersumik Olympiadeqartunut ilaasoqarsinnaassanngila?
Kalaallit arlallit OL-imi peqataasarsimapput kisianni danskit erfalasuata ataani. Amerlanerit ukiukkut OL-ertoqarnerani peqataasarput kisianni aamma aasakkut OL-ertoqartillugu kalaallinik peqataasoqarnikuuvoq.
Kalaaleq siulleq OL-imut peqataasoq tassaavoq eqaarsaartartoq Freddy Jensen. Aqqi tamakkerlugit ukuupput: Josva Frederik Isaias Ananias Jensen, Nuummi 1926-mi inuusoq.
Freddy Jensen 1948-mi Londonimi aasakkut OL-ertoqarnerani atortut eqaarsaarutit atorlugit unamminermi peqataavoq taamaalilluni danskit peqataasut torrallallugu normu 8-nngornerat peqataaffigalugu.
Freddy Jensen aamma Helsinkimi 1952-imi peqataavoq.3
Tigusiffiit:
1) The Voyages and Works of John Davis the Navigator, qupp. 36
2) Tark'igssût 1934 qupp. 23
3) Sports Reference.com