2. septembari 2024-mit meeqqanut atuagaateqarfimmi mobilit, iPadit, tabletit qarasaasiallu atoqqusaajunnaassapput. Atuarusulersitsineq aamma isumaliutiginneqqissaaarnissamik inissaqartitsineq Nunatta Atuagaateqarfiata suliassamisut pingaarnertut qitiutinnissaa nuannaarutigaa. Nunarsuarmi digitaliseriileruttorfimmi ulluinnatsinni mobilit assigisaallu initoorujussuupput, aamma meeqqani. Tamanna Nunatta Atuagaateqarfiata meeqqanut atuagaateqarfimmi mobilit assigisaallu initoorujussuunerat arajutsisimanngilaat. Atuagaateqarfik naapertorlugu ullut tamaasa meeqqanut atuagaateqarfiup inissaqartitsinera sinnerlugu meerarpassuit aggertarput. Amerlanerpaat wi-fi akeqanngitsoq mobilitigut spillernissamut YouTubernissamullu kisiat atorniarlugu aggertarput. Mobilit assigisaallu eqqissiviilliortitsilertarput Nunatta Atuagaateqarfiani mobilit assigisaallu eqqissiviilliortitsilerlutillu nipiliortitsilertartut naammattoorneqartarput. Meeqqat atuakkamik atuarusullutik aggertut toqqissisimanissaannik ajornakusoortitsisarput. “Ilaatigut ilaqutariit mikisunik meerallit aggeraluarlutik eqqissisimaarfiunngitsoq malugigaangamikku aneqqiinnartartut siumortarpagut. Atuarniarnerup ajornakusoornera pissutigalugu atuagaatilerisut arlaleriarlutik qoqernaveeqqutinik peqarnersoq aperineqartarput. Atuagaateqarfimmi atuarsinnaanngikkaanni taava ajortoqarpoq, atuarusulersitsinissamik siuarsaanissamut atuarnermillu kultureqalersitsinissamut iliuuseqartariaqarpugut” atuagaateqarfimmi pisortaq Elisa Petersen oqarpoq. Mobilerpallaarujussuarneq ersarissumik sinaakkuteqanngitsoq Juunimi 2024-mi Qallunaat Nunaanni Peqqinnissamut Qullersaqarfiup meeqqat mobilinik assigisaannillu atuisarnerannut nutaanik innersuussuteqarput. Meeqqat 5-17-inik ukiullit “sunngiffimminni 1-2 tiiminit sivisunerusumik mobilinik assigisaannillu atuinerusariaqanngitsut – sivikinneruppallu pitsaanerussasoq” tassani allaaserisaqarput. Nunatsinni Paarisap, PiSiup aamma Kalaallit Nunaata Politiivisa siornatigut inoqatinut attaveqaatitigut nakuusertunik videolianik ingerlatitseqqiisarneq ilaatigut meeqqaneersuusartut mianersoqqussutigisareerpaat. Tamatuma saniatigut attaveqaqatigiit-tarfinni meeqqat imminnut innarliinngitsumik pissusilersorfigisarnissartik unammillernartittaraat aamma mianersoqqussutigineqartareerpoq. Meeqqanut atuagaateqarfimmi atuagaatilerisut meeqqat arlallit inersimasuniit malinnaavigineqanngitsut erseqqissumillu sinaakkusersorneqanngitsumik ullut tamaasa tiimerpaalunni mobilit assigisaasalu saavanni issiasartut misigisaqarfigisarpaat. “Atuagaateqarfimmi meeqqat sunik isiginnaartarnersut, sunik ingerlatitseqqiisarnersut, aamma nakuusertunut kinguaassiuutitigulluunniit kanngutsaatsuliortunut tunngasunik ingerlatitseqqiisarnersut nakkutigisinnaanngilagut. Angajoqqaat meeeqqatik internetimik atuinissamut sinaakkusersuilluarnissaannik ikiussagaat Paarisap PiSiullu innersuussutigivaat, aamma meeqqat maani kisimiillutik taamaaliunnginnissaat taperserparput”, Elisa Petersen oqarpoq. Malittarisassaq inersimasunut meeqqanut atuagaateqarfimmiittunut aamma atuuppoq Meeqqanut atuagaateqarfimmi mobilinik assigisaannillu atuinnginnissamik malittarisassat nutaat inersimasunut meeqqanik peqateqartunut aamma atuupput. Nunatta Atuagaateqarfiat meeqqat inersimasullu akunnerminni attaveqatigiilluarnissaannik, inersimasut mobilerlutik issianissaanninngaanniit meeeqqamik atuffassinissaannik tapersersuerusuppoq. Septembarip aappaanni atuagaateqarfiup ukiuunerani ammasarfinnik atuutsitsilernera nalerorlugu mobilinut assigisaannullu politikki nutaaq atuutilersinneqassaaq. Ullormi tassani saniatigut allanik suliniutinik aamma atuutilersitsisoqassaaq: 1. Meeqqat 4. klasse ataallugit klassillit inersimasumik ilagisaqarlutik meeqqanut atuagaateqarfimmiissinnaalissapput. 2. Atuagaateqarfimmi kikkut tamarmik inissaqartinnissaat qulakkeerniarlugu meeqqariviit atuagaateqarfiliannginnerminni piffissaq sioqqullugu inniminneeqqaartalissapput, Najoqqutarisaq Peqqinnissamut Qullersaqarfik: https://www.sst.dk/da/Borger/En-sund-hverdag/Sk%C3%A6rmbrug Najoqqutarisaq Paarisa/PiSiu: https://socialstyrelsen.gl/nyheder/2021/05/tal_med_dit_barn?sc_lang=da