Groenlandica ikiortimik sulisussarsiorpoq

Groenlandica Nunatta Atuagaateqarfiata immikkoortortaraa. Ilimmarfimmi inissisimavoq Ilisimatusarfiullu atuagaateqarfia illoqatigalugu. Tamanut saqqummersinneqarsimasunut katersuineq, nalunaarsuineq kulturikkullu tammatsaaleeqataaneq suliarivarput. Atuagaateqarfipput atuakkanik atuagassianillu nunarput nunallu issittut pillugit ilisimatusaatit aammalu nunatsinni inuiaqatigiinnut attuumassuteqarsinnaasut imarai. 

Pingaarnertut makku suliarisassavatit: 

- Pilersarusiukkamik aalajangersimasunik suliaqarneq assersuutigalugu atuagassiat karsinut iliorarlugit

- Atuakkanik ilioraaneq iluarsaassinerlu

- Inniminnersimasat nassaaralugit isumagalugillu

- Annillugit atorneqarsinnaanngitsunik kopeerineq

Naatsorsuutigaarput:

- Kalaallisut qallunaatullu oqalussinnaallutillu allassinaassaatit

- Nammineersinnaassuseqassaatit allanillu suleqateqarsinnaassallutit

- Suliannut peqqissaartuussaatit aalajaatsuullutillu

- Sulianut tulleriiaarillaqqittuussaatit

- Minnerpaamik Ilinniarnertuunngorniarfimmi naammassinnissimassaatit 

- Sulianut suliassanullu assigiinngiiartunut sungiussiasuussaatit

Sapaatip-akunneranut 40 tiimit suliffiupput.  

Atorfininneq akissarsiaqarnerlu Naalakkersuisut SIK-llu akornani isumaqatigiissutit atuuttut malillugit pissaaq. Atorfimmut atatillugu sulisunut inissiamik innersuussisoqarsinnaanngilaq.

Atorfimmut tunngasumik annerusumik paasisaqarnerorusukkuit, Groenlandicami teamlederi Henriette Christensen e-mailikkut henriettec@katak.gl-imut allallutit paasiniaavigisinnaavat.

Atorfimmut soqutiginnikkuit kingusinnerpaamik 25.11.2025 qinnuteqarsinnaavutit. Qinnuteqaatit groenlandica@katak.gl-imut nassiutissavat.