eReolen

Nunatta Atuagaateqarfiata Kalaallit Nunaat tamakkerlugu eReolen tamanut ...

28.02.19
Nunatsinni innuttaasut tamarmik atuagarpassuarnik atuarnissaminnut naalaagaqarnissaminnullu periarfissaqalerput. Danmarkimi innuttaasunut atuagaateqarfiit tamarmik eReolinimik periarfissaqartitsipput. Innuttaasunut atuagaateqarfiit e-reolini 2011-mili qarasaasiaq aqqutigalugu ineriartortittuarnikuuaat.

eReolenip atuakkanillu saqqummersitsiviit isumaqatigiissutigisimasaat atuakkat tusindilippassuit e-boginngorlutik naalaagassanngorlutilluunniit eReolenimiipput. Atuakkanillu nutaanik takkuttoqartuartussaavoq.

Marsip aallaqqaataaniit 2019 nunatsinni innuttaasut tamarmik e-boginik imaluunniit naalaagassanik www.ereolen.dk aqqutigalugu atuisinnaalerput.
www.ereolen.dk iserfigalugu e-bogit qallunaatut oqaasertallit atuarsinnaavatit naalaagassallu qallunaatut naalaarlugit. Kalaallisut oqaasertallit ujarniaraanni  ”sp=kal” iserfigineqassaaq. Kalaallisut oqaasertallit amerlasoorsuunngillat.

www.eReolengo.dk  meeqqanut inuusuttuaqqanullu naleqqussagaavoq. Aamma meeqqanut tuluttut, tyskisut, franskisut kalaallisullu imaqarpoq.

www.eReolenglobal.dk  atuakkat  naalaagassallu tuluttut oqaasertallit qinaasiffigineqarsinnaapput.

E-boginik naalaagassanillu atorusukkaanni Nunatta Atuagaateqarfiani atuisutut allatsissimasariaqarpoq. Nuup avataani najugaqaraann atuisussatullu nalunaarsortinniaraanni illoqarfigisami atuagaateqarfimmut saaffiginnittoqassaaq.

Nunatta Atuagaateqarfiata nittartagaatigut www.katak.gl-ikkut eReolen pillugu aamma qanoq atorsinnaanerlugu paasisaqarnerusoqarsinnaavoq.

Tamassi atuarluassamaarisi!