Anne-Birthe Hove

Anne-Birthe Hove

1951-2012

Anne-Birthe Hove augustimi toqussani tikillugu Kalaallit Nunaanni nalitsinni eqqumiitsuliortut ataqqineqarnerpaat ilagaat. Suliumatoorujussuuvoq imaannaanngitsunik eqqumiitsuliornerup iluani amerlasuunik tamatigoortumik periuseqarluni sulisartoq grafik atorlugu suliaminik pinnersaasarnermigullu ilisimaneqarluartoq.

Anne-Birthe Hovep pinnersakkanik suliai Kalaallit Nunaanni Danmarkimilu sumiiffinni assigiinngitsuni takussaapput. Ilimmarfimmi inersuup ”panoptikon”-ip ilaatigut qaamaneq atorlugu pinnersagaanera nuannersutut misigisarparput inersuarmilu oqalugiartarfiusumi tusarnaarnissamik kaammattuinera malinniartarlugu. Suliaq qarasak – uummat mininnagu aammattaaq Ilimmarfimmi takuneqarsinnaavoq.

Anne-Birthe Hove atuakkanik assiliartalersuisartutut atorneqarluartarsimavoq POST-illu frimærkinik “Moderne grønlandsk kunst”-imik taallugu saqqummersitaani ilaatinneqarpoq.

Anne-Birthe Hovep eqqumiitsuliortut suleqatigiiffiat  ”KIMIK” ilaaffigisimavaa tassanilu 1997-miilli ukiuni qulini siulittaasuulluni. Ukiorpaalunni danskit eqqumiitsuliortut suleqatigiiffianni ”Koloristerne”-mi ilaasortaasimavoq. Ukiut 30-t sinnerlugit nunani allani saqqummersitsisarnerit peqataaffigisarsimavai.

Anne-Birthe Hove allat suliumatuut peqatigalugit ukiuni arlalinni Kalaallit Nunaata namminerisaminik  eqqumiitsulianik saqqummersitsiveqalernissaata sulissutigineqarnera peqataaffigisimavaa. Toqunngitsiarnermini Namminersortut Kulturikkut Nersornaasiuttagaa nipilersortartpoq Ole Kristiansen peqatigalugu pissarsiaraa.