Jessie Kleemann – immikkut ittumik eqqumiitsuliortoq

Jessie Kleemann 1980-ikkunniilli eqqumiitsulioriaatsit assigiinngitsorpassuit atorlugit sulisimavoq. Kalaallit, danskit nunallu tamalaat akornanni eqqumiitsuliornermi nutaaliaasumi pingaarutilimmik immikkuullarissumillu inissisimalersimavoq, suliai pineqartut tassaallutik isiginnaartitsineq, taalliorneq, assilialiorluni eqqumiitsuliorneq, videoliorneq kiisalu eqqumiitsulianik inissititikkanik saqqummersitsinerit (installationer). 

Jessie Kleemann Upernavimmi inuuvoq, Upernavimmi Aasiannilu peroriartorsimalluni. Nagguia kulturialu isumassarsiaanut eqqumiitsuliortaasianullu sunniuteqarluarsimapput. Ullumikkut uinilu Københavnimi najugaqarput. 

"Silarsuarmi sumiinnerma paasinissaa uannut pingaaruteqarluinnartuusoq piffissap ilaani paasisimavara. Qallunaat Nunaanni najugaqarnera kisimi pineqanngilaq.  Oqaluttuarisaanerpulli inuunitsinnut ilaammat, anniaatit sorsuutivullu ersutavut qaqilertariaqartarpavut. Oqaluttuassartara aamma inuiaqatigiit oqaluttuassartaanut ilaavoq," oktobarip 11-anni 2026-mi nersornaasigaaneq pillugu KNR-ip nutaarsiassiinerani taama oqaluttuarpoq. 

Jessie Kleemannimut nersornaatitut aningaasaliissutigineqartoq aningaasatigut toqqissimanarnerusumik pilersitseqataassaaq. Tamatuma eqqumiitsuliornikkut suliaminik nangitseqqinnissamini kiffaanngissuseqarnerulernissaanik periarfississavaa. 

Jessie Kleemann maannakkut Københavnimi Copenhagen Contemporarymi, Vejlemi Spinderihallernemi kiisalu Koreap kujataani Gwangju Biennale 2026-mi saqqummersitsivoq. 

Jessie Kleemannip taalliai eqqumiitsuliaalu atuakkatut saqqummersinneqarsimasut Nunatta Atuagaateqarfiani atorniagassatut pigineqarput. 

Assi: Sisse Dupont/Jyllands-Posten/Ritzau Scanpix