Atuagaateqarfik nunarsuarmi anguniakkanik anguniagalittut akuersissutilik

Nalunngiliuk atuagaateqarfiit FN-ip nunarsuaq tamakkerlugu anguniagaanneersunik arlalinnik ullut tamaasa tapersersuisut? 

Ulluinnarni akeqanngitsunik neqerooruteqarpugut aamma paasissutissanut kiisalu paasissutissiinermut, attaveqatigiinnermut IT-mullu tunngasunik teknikikkut atortorissaaruteqarnikkut iserfigiinnarsinnaasanik atuisoqariaannaavoq, taakkunatigut anguniakkat 1 aamma 9 sulissutigineqarlutik. Taakkununnga atatillugu ilisimatusarnermut, teknologiimut nutaaliornermullu (anguniagaq 17) ikorfartuivugut. Taamaaliornikkut innuttaasut tunngaviusumik kiffaanngissuseqarnissaat aamma paasissutissanik allagaatinillu takunnissinnaatitaanermut periarfissaqarnerannik illersorneqarnissaannut peqataavugut (anguniagaq 16). 

Atuakkanik atuagassianillu kalaallisuunik tammatsaaliinermik suliaqarnitsigut inuiaqatigiinni innuttaasunut iluaqutaasussamik kulturikkut kingornussagut paarissavagut (anguniagaq 11).   

Ulluinnarni illoqarfimmi meeqqat inuusuttullu atuarnermik allannermillu ilinniarnissaannik tapersersorusullugit nutaaliornermik atuarusulersitsinermillu avatangiiseqartitserusulluta neqerooruteqarpugut – kiisalu kingullertut pitsaasumik ilinniarnissaannik tunngavissillugit aqqutissiuukkusuppavut (anguniagaq 4).   
 

Tunngaviusumik anguniakkat saniatigut nunarsuaq tamakkerlugu anguniakkanik anguniagalittut Chora2030 aqqutigalugu akuersissuteqarnissarput toqqarnikuuarput 

Atuagaateqarfittut nunarsuaq tamakkerlugu anguniakkanik anguniagalittut illup iluani sammisassaqartitsisarneq eqqarsaatigalugu pisussaaffeqarpugut – illup iluani avataanilu – taamaaliorluni isumaginninnikkut, aningaasaqarnikkut avatangiisinillu piujuartitsiniarnissaq tunngavigalugit ingerlanneqarsinnaapput. 

Nunatta Atuagaateqarfiani silap pissusianut, aningaasaqarnermut sulisullu atugarissaarnissaannut attuumassutilinnik ileqqoq malillugu iliuuserisartagarigaluatsinnik iluaqutaalluinnartumik allanngortiterinikuuvugut. 

Avataaneersunut suliniutigalugit ukkatarisavut ilaatigut makkuupput: 

• Nalequttat tamponillu aaqartartunut iluaqutissat akeqanngitsut anartarfitsinni tigoriaannaapput, atuisuttalu pisariaqartitsisut peqqissusiannut tunngatillugu suliniutaallutik (anguniakkat 3, 5, 6 aamma 10)   
• Repair Café Nuuk qaammammut ataasiarluni ammatinneqartarpoq, atuisullu aqqusaarsinnaapput pigisaminnillu igitassaraluaminnik aaqqissuiartorsinnaallutik. Aaqqissuussinernut kajumissutsimik ikiuuttartoqarpoq (anguniagaq 12) 
• Meeqqat alapernaassusiannik nutaaliorsinnaassusiannillu tapersersorniarlugit meeqqanut atuagaateqarfik mobilinik assigisaannillu atuiffiujunnaarnikuuvoq, skærmimik atuisarnerujussuaq killilersimaarniarneqarluni. Taarsiullugu meeqqanut atuagaateqarfimmi ilorrisimaarluni  ukkatarineqarsinnaasut sammineqarsinnaalerput (anguniagaq 4). Taarsiullugu meeqqanut atuakkanik atorniartarfimmi nuannisaqatigiittoqarpoq 
• Meeqqanut atuagaateqarfiup mobilinik assigisaannillu atuiffiujunnaarnera ilutigalugu nutaaliorluni sulliveqartarneq suliutigineqarpoq, pingasunngornerit tamaasa meeqqanut sammisassaqartitsisarneq neqeroorutigineqartalerluni  (anguniagaq 4). 
• Atuakkat karsimiittut akeqanngitsut tigoriaannaat maanna atuisunut neqeroorutigineqarput – atuakkat katersaatitsinneersut atorunnaagaapput, allanulli iluaqutaasinnaallutik (anguniagaq 12)