Sulisussarsiorneq

Nunatta Atuagaateqarfia marlunnik sulisussarsiorpoq

Nunatta Atuagaateqarfiani Team Nunarput kalaallisut atuakkanik atuakkialerinermillu soqutigisalimmik suleqatissarsiorpoq.

Nunatta Atuagaateqarfiani Team Nunarpumi suleqatissarsiorpugut 1. maj 2019 isumaqatigiissuteqarnikkulluunniit atorfinittussamik.

Team Nunarput tassaavoq Nunatta Atuagaateqarfiani immikkoortortaq kalaallisut atuakkanik, atuakkiortunik nunatsinnilu pingaartitatsinnik avammut nittarsaassinermik akisussaaffilik.

Oqalugiartitsinerni, saqqummersitsinerni allanilluunniit aaqqissuussinerni nunatsinni naleqartitatta ileqquttalu ilanngunneqartarnissaannik pingaartitsisuuvugut  aaqqissuussallu kalaallisut ingerlanneqartarnissaannik qulakkeerinniniartarluta.

Nunatsinni innuttaasunut atuagaateqarfinnut siunnersortaavugut pikkorissaasarlutalu.

Pingaarnertut suliassatit:

  • Atuakkanik kalaallisuunik nunatsinni innuttaasunut atuagaateqarfinni agguaassinerni nittarsaassinermilu suleqataaneq.
  • Kalaallisut atuakkiortut atuakkallu pillugit saqqummersitalioqataasarneq.
  • Atuakkanik kalaallisuunik oqaatsillu allat atorlugit allaqqasunik  nakkutiginninneq atuagaateqarfinnullu tuniniaaneq.
  • Ukiumoortumik nalunaarusiap katersorneraniit saqqummernissaanut suleqataaneq.
  • Avammut nittarsaassinermi kalaallisut allaqqasunik kukkunersiuisarneq.
  • Meeqqanut inersimasunullu atuagaateqarfimmi atuagaatilerisut paarlakaallutik sullissisarnerannut peqataasarneq.

Kissaatigaarput

  • Minnerpaamik Ilisimatusarfimmit bacheloritut tassungaluunniit assigusumik imaluunniit atuagaatilerisutut ilinniarsimassutit.
  • Kiffartuussinissamut atuisunullu assigiinngitsunut sullissisinnaasutit.
  • Nammineersinnaasutit akisussaassuseqarnermillu pingaartitsisutit.
  • Kalaallisut atuakkanik atuarsinnaallutillu paasinnissinnaasutit.

Qinnuteqarfissaq

Ulloq qinnuteqarfissaq kingulleq apriilip 3-at 2019

Atorfininnissamut oqaloqatiginnitoqarnissaa naatsorsuutigineqarpoq sap.ak. 14-imi

Akissarsiat atorfininninermilu atugassarititat
Akissarsiat- aamma atorfininnermi atugassarititat, atorfininnermi soraarnermilu angalaneq, Namminersorlutik Oqartussat kattuffiullu ilaasortaaffigisap isumaqatigiissutaat atuuttut malillugit.

Sapaatip-akunneranut nal. ak. 40 tiimit suliffiuvoq.

Ineqarneq

Atorfimmut atatillugu inissaqartitsisoqarsinnaanngilaq. Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Paasissutissat allat
Atorfik pillugu paasisaqarnerorusukkuit Team Nunarpumi aqutsisoq Henriette Christensen inna@katak.gl allaffigisinnaavatit.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.

E-mail-ikkut qinnuteqaatinik tigusineq ajorpugut

Qinnuteqaat nassiuguk

 

Groenlandimi aqutsisussarsiorpugut

Nunatta Atuagaateqarfiata immikkoortortaani Groenlandicami, Nunarput Inuilu pillugit atuagaateqarfimmi atorfik soqutiginartoq pissanganartorlu inuttassarsiuunneqarpoq. 1. juni 2019 sulilersussamik.

Takorloortarpiuk katersaatinik qanganitsanik nutaanillu suliaqartarnissat kiisalu nunatta kulturikkut kingornussaanik eriaginneqataanissat? Aqutsisutut piginnaasatit suleqatinnut aqutsisunullu allanut sunniuteqartinnissaat siunissaq qaninnerusoq ungasinnerusorlu eqqarsaatigalugu kivitseqataarusuppit? Taava immaqa illiuvoq teamitsinni aqutsisussarput.

Groenlandicami suleqatit peqatigalugit suliffiup avataaniittunik kulturimik suliniuteqartartunik allanillu suleqateqartarneq ineriartortissavarsi.

Suliassat:

  • Ulluinnarni ingerlatsineq
  • Pinngitsoornani tunniussisussaatitaanermik inatsisip malinneqarnissaanut qulakkeerinninneq
  • Cicero LMS-imik suleriutsimik ukkatarinninneq
  • Nunat tamat assigiaartumik katalogiseriisarnerat malillugu nunatsinni nalunaarsuisarnerup pitsaassusaata qulakkeernissaa
  • Inerisaanermi suliassanik aallarnisaanerit
  • Ilimmarfimmi atuagaateqarfik Groenlandicap Ilisimatusarfiullu ataatsimut atuagaateqarfigivaat. Atuagaateqarfimmi atuagaatilerisut paarlakaallutik sullissisarnerannut ilaasassaatit
  • Groenlandicami teamimi aqutsisutut Nunatta Atuagaateqarfiani aqutsisunut  ilaassaatit kiisalu teamit arlaannut suleqataasassallutit

Naatsorsuutigaarput:

  • Atuagaatilerisutut, allagaatilerisutut imaluunniit taakkutut qaffasissusilimmik ilinniagaqarsimassasutit
  • Kalaallit Nunaanni inuiaqatigiit aaqqissugaanerat kulturiallu soqutigissagitit
  • Oqaatsit pingasut atorlugit sullissisaratta, kalaallisut, qallunaatut tuluttullu piginnaasaqassasutit
  • Alapernaattuussasutit, peqqissaartuussasutit, tunniusimasuullutit akisussaaffimmillu pingaartitsisuussasutit

 

Qinnuteqarfissaq ulloq kingulleq 23. april 2019

 

Oqaloqateqarnerit pissapput sapaatip-akunnera 18

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik.

 

Paasissutissat erseqqinnerusut

Atorfik pillugu paasisaqarnerorusukkuit pisortaq attavigisinnaavat Elisa Petersen (elisa@katak.gl – tlf.: +299 348921). Atuagaateqarfiit pillugit annertunerusumik paasisaqarusukkuit www.katak.gl alakkararuk.