Lisathep innersuussai
"Hanseeqqap ullorsiutai: 1884-85-imi Tunuliarnermik allakkat”
Johannes (Hanseeraq) Hansen, 1983
- Kalaallit Nunaanni ilisimasassarsiornernik soqutigisaqartunut tamanut
"1884-1885-imi tunumut ajoqersuiartortitanut siullernut angalaqataasup “Hanseeqqap” Johannes Hansenip umiamik tunuliarnerminnik ullorsiutai assorujussuaq soqutiginarlutillu tiguartinnarput. Nuannequtigivaa nunat aqqi taakkartortagai malillugit sumut killinneri malinnaavigigakkit. Sumi inunnik naapitsinersut sumiiffinnilu assigiinngitsuni pinngortitap qanoq ittuunera soqarnersorlu assilianngortuusillugit malinnaavigaakka. Nunat aqqi taakkartugai ugguuna ujaasiffigisarlugit malinnaavigineqarsinnaapput: https://nunataqqi.gl/
Atuagassaaleqisunut innersuuterujussuarpara."
- Lisathe (Attaveqatigiinnermi suleqataasoq)
"Inuillisimasup ikioqqunera"
Otto Steenholdt, 2001
- Inersimasunut atuartartunut
"Inuillisimasup ikioqqunera" tiguartinnarluinnartumik allalluagaavoq. Saqqummeqqaarmat pisiareriarlugu atuarakku tiguartiffigeqqarsuaarakku sivisunngitsumik atuarpara. Angutip qivittumik naapitsineranik ikiuineranillu imaqarpoq. Atuarsimanngikkukku nuannersumillu atuagassaaleqiguit Nunatta Atuagaateqarfianut kalaallisuua qallunaatuualuunniit atorniarsinnaavat."
- Lisathe (Attaveqatigiinnermi suleqataasoq)
"Arfeq nattoralillu-niviarsiarannguillu marluk"
Kalaallit oqaluttuatoqaat Tupaarnaq Rosing Olsenimit oqaluttuareqqinneqartoq, 2015-imi aappassaanik saqqummersitaq (1994-imi saqqummersinneqaqqaartoq)
- Meeqqanut atuakkiaq (6-9-nik ukiulinnut)
"Kalaallit oqaluttuatoqaannik ilisimasaqarluarpugut, soorlu Kaassassuk, Anngannguujunnguaq Sassuma Arnaalu. Kisianni kalaallit oqaluttuatoqaat meeqqanoortut allat aamma ilisimanerusariaqarpavut. Una atuagaq kalaallisut qallunaatullu atuagaateqarfimmiittuutigaarput. Oqaluttuatoqaq meeqqanut atuagaateqarfimmi iikkami qalipakkanut ilaavoq."
- Lisathe (Attaveqatigiinnermi suleqataasoq)