Hypnose pillugu saqqummiineq

Eqqarsartaatsikkut eqqissisimannginneq, uippakajaarneq annilaangasarnerluunniit qanoq misigiffiusarnersut nalunngiligit?

Hypnose tassaavoq qaratsap malugisaqanngissutsip silarsuaani qanoq ittarnersoq pillugu paasinninneq, ileqqutta pissusilersuutigisartakkattalu 80-90 %-iinik automatiskimik aqutsisuusup ilaa. Qaratsamik taamatut paasinninnikkut imminut tatiginerup imminullu pingaartinnerup nukittorsarneqarsinnaanera ilinniarneqarsinnaavoq.

Aammattaaq uippakajaarunnaarsitsisinnaavoq, annilaangasarunnaarsitsisinnaavoq misilitsinnissamullu annilaangasarunnaarsitsisinnaalluni aamma oqimaassutsimik allanngortitsisinnaalluni.

Saqqummiinerup nalaani hypnose ataatsimoorluta nalorninarunnaarsissavarput aamma arlalialunnguanik sungiusaateqalaassalluta, taamaalillutit qanoq iliorlutit automatiskimik qisuariartarnivit sunnersinnaanissaanik nammineerlutit misigisaqarsinnaassagavit.

Saqqummiisussaq pillugu:

John Erik Madsen ingeniøritut ilinniarsimasuuvoq, ukiunili kingullerni 23-ni saniatigut inuussutissarsiutigalugu hypnose atorlugu katsorsaasarnermik suliaqarluni.