Oqaluttuassartaa

Greenlandic
Groenlandicap oqaluttuassartamernga

Atuagaateqalernissamik pilersaarutit siulliit 1700-kkunnili saqqummiunneqarsimapput. Atuagaateqarfiit siulliit taakku qallunaanut atorfilinnut atorneqarsinnaasimapput. 1800-kkut qeqqata aallartisimalernerani ajoqersuiartortitat atuagaatinik kalaallinut neqerooruteqartarsimapput. Atuagaateqarnermut inatsit aatsaat 1956-imi pilersinneqarsimavoq.

Atuagaateqarnermik inatsisip pilersinnera ilutigalugu atuagaatilerisutut ilinniarsimasoq siulleq Hans Westermann Kalaallit Nunaanni atorfinitsinneqarpoq. Westermannip atuagaateqarfeqarneq 1950-kkunni ineriartortissimavaa kiisalu Kalaallit Nunaata akisussaaffik 1979-imi tigussammagu piareersarlugu. 

Westermannimuna 50-kkunni Groenlandicami katersugaatit siulliit pilersikkai. Aallaqqaammut atuagaatit Kalaallit Nunaanni, naqinneqartarsimasut pisoqqat aallaqqaatigalugit toqqorlugit katersugaatissatut pilersinneqaqqaarsimagaluarput. 

Namminersornerulerneq 1979-imi eqqunneqarmat  bibliotekeqarnermut oqartussaaffik akisussaaffigineqalerpoq. Groenlandica Nunatta Atuagaateqarfiata immikkoortortaatut suli inissisimatinneqarpoq  2007-ilu tikillugu illumi ataatsimi inissisimasimallutik.

Marsip 7-iani 2008 Groenlandica  Ilimmarfimmi ammarpoq. Ilimmarfimmi Ilisimatusarfiup atuagaateqarfia ataatsimooqatigilerlugu inissippoq, taamaakkaluartorli aaqqissuusaanikkut Nunatta Atuagaateqarfiata ataani suli inissisimalluni. Taamaattorli ataatsimoortitsilernermi Kalaallit Nunaata namminerisaminik inuiattut ilisimatusarnikkullu atuagaateqarfeqalernissaanut alloriarneq annertuvoq.